ချမ်းမြေ့သာစည် လေယာဉ်ကွင်းကို အသုံးပြု၍ အရပ်ဘက် လေယာဉ်မောင်း သင်ကျောင်း ဖွင့်လှစ်မည်

မန္တလေးမြို့ ချမ်းမြသာစည်လေယာဉ်ကွင်းကို အသုံးပြု၍ အရပ်ဘက် လေယာဉ်မောင်း သင်တန်းကျောင်း ဖွင့်လှစ်၍ ပြည်တွင်း၊ ပြည်ပ လေကြောင်း လိုင်းများအတွက် အရည်အချင်း ပြည့်မီသော လေယာဉ်မှူးများ မွေးထုတ်ရေး၊ လေကြောင်း ပညာရပ်ကို စိတ်ဝင်စားသူများနှင့် အပျော်တမ်း လေယာဉ်မောင်းနှင့် လိုသူများအတွက် ပျံသန်းရေးကလပ် (Flying Club) များ ဖွင့်လှစ် သင်ကြားလေ့ကျင့် ပေးရေးလုပ်ငန်းများ ဆောင်ရွက်သွားမည်ဟု ပို့ဆောင်ရေး ဝန်ကြီးဌာန ပြည်ထောင်စုဝန်ကြီးက ပြည်သူ့လွှတ်တော်တွင် ပြောသည်။ ချမ်းမြသာစည် လေယာဉ်ကွင်းတွင် အရပ်ဘက် လေယာဉ်မောင်း သင်တန်းကျောင်းနှင့် အပျော်တမ်း ပျံသန်းရေး ကလပ်ဖွင့်လှစ်ပါက ထိုလေဆိပ်သည် စည်ကား လာမည်ဖြစ်ပြီး မန္တလေးမြို့၏ ဂုဏ်ဆောင် လေကြောင်းပညာပေး နေရာတစ်ခု ဖြစ်လာမည် ဖြစ်ကြောင်း၊ ထို့အပြင် ချမ်းမြသာစည် လေယာဉ်ကွင်းသည် အလျားပေပေါင်း ၆၅၀၀၊ အနံပေ ၁၀၀ ရှိသည့်အတွက် တံတားဦး လေယာဉ်ကွင်း၏ အရေးပေါ် အရန် လေယာဉ်ကွင်းအဖြစ် အသုံးပြုနိုင်ကြောင်း ပြည်ထောင်စုဝန်ကြီးက ဆိုသည်။ ချမ်းမြသာစည် လေယာဉ်ကွင်းသည် ၇၅ တန်ရှိသည့် F-28 နှင့် အထက်လေယာဉ်များ ဆင်းသက်နိုင်ပြီး အပြည်ပြည်ဆိုင်ရာ လေကြောင်းပျံသန်းမှုအတွက် Conpulsory Reporiting Point အဖြစ် ဆက်လက်ထားရှိ၍ မန္တလေးမြို့၏ ကျက်သရေဆောင် အရပ်ဘက် လေယာဉ်မောင်းသင်တန်းကျောင်းနှင့် အပျော်တမ်း ပျံသန်းရေး ကလပ် (Flying Club) ဖွင့် လှစ်ရေး ဆောင်ရွက်လျက် ရှိကြောင်း သိရသည်။ ချမ်းမြသာစည် လေယာဉ်ကွင်းသည် မြန်မာနိုင်ငံ ဝေဟင်ပိုင်နက်အတွင်း ဖြတ်ကျော် ပျံသန်းလျက်ရှိသော လေယာဉ်ပေါင်း နေ့စဉ် (၄၅၀) ရှိသည့်အနက် ချမ်းမြသာစည် လေဆိပ်သို့ သတင်းပို့ရသည်။ လေယာဉ်အစင်းရေ (၂၀၀) ရှိသည့်အတွက် ချမ်းမြသာစည် လေဆိပ်သည် တစ်ကမ္ဘာလုံး လေကြောင်း ပို့ဆောင်ရေးတွင် အရေးကြီးသည့် နေရာတွင်ရှိကြောင်း ၂၀၁၂ ခုနှစ် ဖေဖော်ဝါရီ ၂၈ ရက်နေ့ထုတ် News Watch Weekly ဂျာနယ်တွင် ဖော်ပြထားပါသည်။

Posted in: အထွေထွေ