အုပ်ချုပ်သူနှင့် အုပ်ချုပ်ခံ သဘောအမြင်များ ပြောင်းလဲသင့်ပြီဟု နိုင်ငံတော် သမ္မတ အကြံပေး ပြော

အုပ်ချုပ်သူနှင့် အုပ်ချုပ်ခံဟူသည့် သဘောထားများကို ဆက်လက် ကျင့်သုံးရန် မသင့်တော့ကြောင်း နိုင်ငံတော်သမ္မတ နိုင်ငံရေးအကြံပေး အဖွဲ့ခေါင်းဆောင် ဦးကိုကိုလှိုင်က ပြောသည်။ ယင်းကို ဖေဖော်ဝါရီ ၁၀ ရက်နေ့က ရန်ကုန်မြို့တော် စည်ပင်သာယာရေး ကော်မတီ (မြို့တော်ခန်းမ) ၌ ပြုလုပ်သော စည်ပင်အမှုထမ်း အရာထမ်းများအား ဟောပြောစဉ် အထက်ပါအတိုင်း ပြောကြားခဲ့ခြင်းဖြစ်သည်။ ၎င်းက အစိုးရနှင့် ပြည်သူများအကြားတွင် အုပ်ချုပ်သူ၊ အုပ်ချုပ်ခံဟူသည့် သဘောထားများကို ပြောင်းလဲသင့်ပြီဖြစ်ကြောင်း၊ သို့မှသာ ဒီမိုကရေစီ ပန်းတိုင်သို့ ရောက်ရန် လွယ်ကူမည်ဖြစ်ကြောင်း ပြောသည်။ “ဒီမိုကရေစီခေတ်ကို လျှောက်လှမ်းတဲ့အခါမှာ ပြည်သူတွေရဲ့ သဘောဆန္ဒကိုပါ ထည့်သွင်း စဉ်းစားဖို့ လိုပါတယ်” ဟု ၎င်းက ထပ်လောင်းပြောသည်။ လက်ရှိအစိုးရသည် ပြည်သူများ တင်မြှောက်ထားခြင်း ဖြစ်သည့်အတွက် ပြည်သူ့အစိုးရဖြစ်ပြီး အစိုးရ ဝန်ထမ်းများမှာလည်း ပြည်သူ၏ အခွန်ငွေဖြင့် လခပေးအပ်ထားသည့်အတွက် ပြည်သူ့ဝန်ထမ်းများသာ ဖြစ်သည်ဟု ၎င်းက စည်ပင်ဝန်ထမ်းများကို ပြောသည်။ “အစိုးရ ဝန်ထမ်းတွေအနေနဲ့ ပြည်သူ့ဝန်ထမ်းဆိုတဲ့ သဘောထားသာ ပြောင်းလိုက်ရင် ပြည်သူတွေအတွက် ဘာလုပ်ပေးရမလဲဆိုတာ ဖြစ်လာမယ်။ ဒါမှသာ ပြည်သူကလည်း ဒီအစိုးရက ငါတို့အစိုးရပဲ၊ ငါတို့လိုချင်တာ လိုအပ်တာ ပြောလို့ရပြီ၊ အားကိုးလို့ရပြီ၊ သူတို့နဲ့ ပူးပေါင်းမှ ဖြစ်မယ်။ ဒါမှသာ ပိုပြီးတော့ သဟဇာတဖြစ်တဲ့ အပြောင်အလဲကို သွားမယ်ဆိုတာမျိုး ဖြစ်လာပါမယ်။ အဲဒီလို သွားချင်ပါတယ်” ဟု အစိုးရနှင့် ပြည်သူကြား အပေးအယူ မျှတရန် လိုပုံကို ပြောသည်။ အစိုးရဟု ဆိုရာ၌ ဌာနပေါင်းစုံ ပါဝင်သဖြင့် အစိုးရဌာန တစ်ခုချင်းစီ၏ အပြုအမူများသည် အစိုးရဌာန တစ်ခုလုံးနှင့် သက်ဆိုင်သည့်အတွက် ဌာနတစ်ခုချင်းစီ၏ လုပ်ရပ်တိုင်းသည် အရေးကြီးပြီး ကောင်းမွန်သည့် အစိုးရဖြစ်ရန်အတွက် အစိုးရဝန်ထမ်းများသည်လည်း ပြည်သူလူထုအပေါ် ဆက်ဆံရေး ကောင်းမွန်ရန် လိုအပ်သည်ဟု ၎င်းက ဆိုသည်။ အစိုးရအနေဖြင့် လူ့အဖွဲ့အစည်းကို စနစ်တကျဖြစ်ရန် ထိန်းချုပ်ပေးရာ၌ ပြည်သူလူထု၏ အခွင့်အရေးကို မထိခိုက်ရန်နှင့် စည်းကမ်းကိုလည်း ထိန်းသိမ်းနိုင်ရန် မျှတအောင် လမ်းကြောင်းပေးသင့်သည်ဟု ၎င်းက ဆက်လက်ပြောသည်။

Posted in: နိုင်ငံရေး